នៅថ្ងៃទី២៩ មេសា ឆ្នាំ២០២៥ អង្គការសមាគមខ្មែរកម្ពុជាក្រោម នឹងដាក់ញត្តិទៅកាន់ស្ថានទូត និងស្ថាប័នអន្តរជាតិនានាក្នុងទីក្រុងភ្នំពេញ។ កម្មវត្ថុនៃការដាក់ញត្តិនេះ គឺដើម្បីទាមទារឲ្យអាជ្ញាធរវៀតណាមដោះលែងព្រះសង្ឃ និងពលរដ្ឋខ្មែរក្រោម ដែលកំពុងជាប់ឃុំឃាំងនៅក្នុងប្រទេសវៀតណាម រួមទាំងទាមទារឲ្យអាជ្ញាធរវៀតណាមបញ្ឈប់ការរំលោភសិទ្ធិពលរដ្ឋខ្មែរក្រោម។
នៅក្នុងសេចក្តីប្រកាសព័ត៌មានរបស់ខ្លួន អង្គការសមាគមខ្មែរកម្ពុជាក្រោម ដែលមានទីតាំងនៅទីក្រុងភ្នំពេញ អះអាងថា នឹងរៀបចំការជួបជុំ និងដង្ហែញត្តិដាក់ជូនបណ្តាស្ថានទូត និងស្ថាប័នអន្តរជាតិនាព្រឹកថ្ងៃទី២៩ មេសាដើម្បីឲ្យអាជ្ញាធរវៀតណាម ដោះលែងព្រះសង្ឃ និងពលរដ្ឋខ្មែរក្រោម ១៦អង្គ/នាក់ដែលកំពុងជាប់ឃុំ។ ក្រៅពីការស្នើសុំឲ្យគោរពសិទ្ធិមនុស្ស និងដោះលែងពលរដ្ឋខ្មែរក្រោម អង្គការសមាគមខ្មែរកម្ពុជាក្រោម ក៏ចង់ឃើញរដ្ឋាភិបាលវៀតណាម សាងសង់ឡើងវិញនូវសាលាឆទាន ដែលអាជ្ញាធរវៀតណាមបានកំទេចនៅខេត្តលង់ហោរ កាលពីដើមខែមេសា ឆ្នាំ២០២៤។ ទន្ទឹមគ្នានេះ អង្គការសមាគមខ្មែរកម្ពុជាក្រោម ក៏ទទូចឲ្យអាជ្ញាធរវៀតណាមបញ្ឍប់រាល់សកម្មភាពគំរាមកំហែងគ្រប់រូបភាពលើពលរដ្ឋខ្មែរក្រោមដែរ។
គួរបញ្ចាក់ថា គម្រោងរៀបចំការជួបជុំ និងដង្ហែញត្តិដាក់ជូនបណ្តាស្ថានទូត និងស្ថាប័នអន្តរជាតិរបស់អង្គការសមាគមខ្មែរកម្ពុជាក្រោម នៅព្រឹកថ្ងៃទី២៩ មេសា ទទួលបានការអនុញ្ញាតពីសាលាក្រុងភ្នំពេញតាមរយៈជំនួបមួយ កាលពីថ្ងៃទី២២ មេសា។ តែសាលាក្រុងភ្នំពេញបានអនុញ្ញាតឲ្យរៀបចំនៅទីស្នាក់ការរបស់អង្គការសមាគមខ្មែរកម្ពុជាក្រោម និងយល់ព្រមឲ្យមានអ្នកចូលរួមប្រមាណ ២០០នាក់។ ម្យ៉ាងទៀត ការរៀបចំនឹងត្រូវធ្វើឡើងតែមួយព្រឹកពេញ ដោយមានការរៀបចំការសម្តែងមតិ និងមានតំណាងដាក់ញត្តិទៅក្រសួងការបរទេសកម្ពុជា រួមទាំងការប្រារព្ធពិធីសាសនា ដើម្បីជាកិច្ចបញ្ចប់នៃយុទ្ធនាការ។
សូមជម្រាបជូនថា កាលពីថ្ងៃទី២៧ ខែមីនា ឆ្នាំ២០២៥ កន្លងទៅថ្មីៗ នេះ មានព្រះសង្ឃ និងពលរដ្ឋខ្មែរក្រោម ចំនួន ៣អង្គ/នាក់ត្រូវបានអាជ្ញាធរវៀតណាមក្នុងខេត្តព្រះត្រពាំងចាប់ខ្លួន ក្រោមបទចោទប្រកាន់ «កេងចំណេញលើសិទ្ធិសេរីភាព និងលទ្ធិប្រជាធិបតេយ្យ»។ ការចាប់ខ្លួនកាលណោះ សហព័ន្ធខ្មែរកម្ពុជាក្រោម ថ្កោលទោសយ៉ាងខ្លាំង និងថា រដ្ឋាភិបាលវៀតណាមបានគាបសង្កត់សិទ្ធិសេរីភាពពលរដ្ឋខ្មែរក្រោម ពិសេសលើការតស៊ូមតិដើម្បីសិទ្ធិជនជាតិដើម សិទ្ធិសេរីភាពខាងផ្នែកសាសនា និងការអភិរក្សវប្បធម៌៕
Leave a Reply