សហព័ន្ធខ្មែរកម្ពុជាក្រោម ប្រចាំតំបន់ប្រទេសកម្ពុជា នាំយកអំណោយជាសម្ភារគ្រឿងឧបភោគបរិភោគរបស់សហព័ន្ធខ្មែរកម្ពុជាក្រោម មានមូលដ្ឋាននៅសហរដ្ឋអាមេរិក សម្រាប់ផ្តល់ជូនប្រជាពលរដ្ឋភៀសសឹក ដែលមកស្នាក់នៅមណ្ឌលសុវត្ថិភាព ក្រោយការឈ្លានពានរបស់យោធាថៃ ចាប់តាំងពីថ្ងៃទី ៧ ខែធ្នូ ឆ្នាំ ២០២៥ ។
ប្រធាន សហព័ន្ធខ្មែរកម្ពុជាក្រោម ប្រចាំតំបន់ប្រទេសកម្ពុជា លោក តាំង សារៈ នៅថ្ងៃទី ១១ ខែមករា ឆ្នាំ ២០២៦ បានដឹកនាំអង្គការ សមាគមខ្មែរកម្ពុជាក្រោម រួមមាន លោក សឺន យឿង ប្រធានលេខាធិការដ្ឋាន នៃ អង្គការ សមាគមខ្មែរកម្ពុជាក្រោម និងជាប្រធានប្រតិបត្តិសមាគមខ្មែរកម្ពុជាក្រោម ដើម្បីសិទ្ធិមនុស្ស និងអភិវឌ្ឍន៍ តំណាងព្រះសង្ឃវត្តសាមគ្គីរង្សី ហៅវត្តខ្មែរកម្ពុជាក្រោម តំណាងសម្ព័ន្ធសមណនិស្សិត-និស្សិតខ្មែរកម្ពុជាក្រោម និងតំណាងព្រះសង្ឃខ្មែរក្រោម កុដិលេខ ១៩ វត្តនាគវ័ន្ត និមន្ត និងអញ្ជើញចុះសំណេះសំណាល សួរសុខទុក្ខ និងនាំយកស្បៀងអាហារ និងសម្ភារផ្សេងៗ របស់សាខាសហព័ន្ធខ្មែរកម្ពុជាក្រោម ប្រចាំទីក្រុងហ្វីឡាឌែលហ្វីយ៉ា (Philadelphia) នៃ រដ្ឋភែនស៊ីលវែនញ៉ា (Pennsylvania) សហរដ្ឋអាមេរិក ដើម្បីចែកជូនប្រជាពលរដ្ឋជាជនភៀសសឹកចំនួន ១៥០ គ្រួសារ កំពុងស្នាក់នៅក្នុងជំរំភៀសសឹកជាបណ្តោះអាសន្ន ស្ថិតនៅក្នុងវត្តប្រមោយ ក្នុងឃុំប្រមោយ ស្រុកវាលវែង ខេត្តពោធិ៍សាត់ ។
ក្នុងឱកាសនោះ លោក តាំង សារៈ បានថ្លែងពីស្មារតី «ខ្មែរតែមួយ» ទោះខ្មែរកណ្តាលស្ថិតក្នុងស្ថានភាពណាក៏ដោយ ក៏ខ្មែរក្រោមមិនដែលបោះបង់ចោលឡើយ។ លោកបានលើកឡើងថា ដោយមើលឃើញពីទុក្ខលំបាករបស់ប្រជាពលរដ្ឋកម្ពុជាកណ្តាល គឺជាការឈឺចាប់របស់ប្រជាពលរដ្ឋកម្ពុជាក្រោមដែរនោះ ទើបធ្វើឱ្យខ្មែរក្រោម នៅគ្រប់ទិសទី នាំគ្នារៃអង្គាសជំនួយ ដើម្បីជួយដល់ប្រជាពលរដ្ឋខ្មែរ ក្នុងគ្រាលំបាកនៅចំពោះមុខ ដែលត្រូវបានជម្លៀសចេញពីលំនៅឋាន ដោយសារខេត្តនៅជាប់ព្រំដែន ទទួលរងផលប៉ពាល់ពីសង្គ្រាមឈ្លានពានរបស់សៀមមកលើបូរណភាពទឹកដី និងដែនអធិបតេយ្យកម្ពុជា ។
ចំណែកតំណាងអាជ្ញាធរមូលដ្ឋានគឺលោក ធាង ឡេង អភិបាល នៃគណៈអភិបាលស្រុកវាលវែង បានថ្លែងអំណរគុណ ចំពោះ សហព័ន្ធខ្មែរកម្ពុជាក្រោម ក្រុមការងារអង្គការ សមាគមខ្មែរកម្ពុជាក្រោម សប្បុរសជន និងម្ចាស់ជំនួយទាំងអស់ ដែលបាននាំយកអំណោយជាស្បៀងអាហារ សម្រាប់ចែកជូនពលរដ្ឋភៀសសឹក ដែលកំពុងខ្វះខាតនាពេលនេះ។
អំណោយ ដែលបានប្រគល់ជូនជនភៀសសឹកសរុបចំនួន ១៥០ គ្រួសារ ដែលក្នុងនោះមួយគ្រួសារទទួលបាន អង្ករចំនួន ១០ គីឡូក្រាម, មីមួយកេស (៣០ កញ្ចប់), ត្រីខកំប៉ុង ១ យួរ (៦ កំប៉ុង), ទឹកត្រី ១ យួរ ( ៦ ដប) និងទឹកស៊ីអ៊ីវ ១ យួរ ( ៦ ដប) ។
គួររំឭកផងដែរថា នេះជាលើកទីប្រាំហើយ ដែលសហព័ន្ធខ្មែរកម្ពុជាក្រោម បានចុះចែកជំនួយដល់ពលរដ្ឋជនភៀសសឹក ដែលរងផលប៉ះពាល់នៃសង្គ្រាមឈ្លានពានរបស់សៀមមកលើប្រទេសកម្ពុជា ទាំងពីរលើកនោះ រួមមានខេត្តសៀមរាប ខេត្តឧត្ដរមានជ័យ ខេត្តព្រះវិហារ ខេត្តបន្ទាយមានជ័យ និងខេត្តពោធិ៍សាត់ ជាដើម៕
Leave a Reply