អាជ្ញាធរវៀតណាម នៅខេត្តលង់ហោរ (វិញឡុង) ដែលពីមុនជាខេត្តព្រះត្រពាំង បានចាប់ខ្លួនសកម្មជនខ្មែរក្រោមម្នាក់ទៀត គឺលោក ថាច់ ចន្ត្រា (Thạch Chanh Tra) ក្រោមបទចោទ «កេងចំណេញលើសិទ្ធិសេរីភាព និងលទ្ធិប្រជាធិបតេយ្យ» តាមមាត្រា ៣៣១ នៃក្រមព្រហ្មទណ្ឌវៀតណាម ។
តាមសេចក្ដីប្រកាសព័ត៌មានរបស់សមត្ថកិច្ចនគរបាលខេត្តលង់ហោរ ចេញផ្សាយនៅថ្ងៃទី ២៩ ខែមេសា អាជ្ញាធរបានឃុំខ្លួនបណ្ដោះអាសន្នលោក ថាច់ ចន្ត្រា អាយុ ៥៣ ឆ្នាំ រស់នៅភូមិទ្រព្រះបាទ ខេត្តព្រះត្រពាំង (លង់ហោរ) ដើម្បីបើកការស៊ើបអង្កេត ។
អាជ្ញាធរវៀតណាម អះអាងថា លោក ថាច់ ចន្ត្រា បានប្រើប្រាស់បណ្ដាញសង្គម ដើម្បីផ្សព្វផ្សាយ និងចែករំលែកព័ត៌មានដែលពួកគេចាត់ទុកថា មិនពិត ព្រមទាំងចូលរួមពិភាក្សាអំពីបញ្ហានយោបាយ និងសាសនា ដែលរដ្ឋាភិបាលវៀតណាមចាត់ទុកថា ជាការបង្ខូចគោលនយោបាយរដ្ឋ និងបង្កការបែកបាក់សាមគ្គីភាពជាតិ ។
កន្លងមក អាជ្ញាធរវៀតណាម ធ្លាប់ចាប់ខ្លួន និងផ្ដន្ទាទោសសកម្មជនខ្មែរក្រោម និងព្រះសង្ឃខ្មែរក្រោមជាច្រើននាក់ ក្រោមបទចោទប្រហាក់ប្រហែលគ្នា ពាក់ព័ន្ធនឹងការប្រើប្រាស់សិទ្ធិសេរីភាពបញ្ចេញមតិ សិទ្ធិសាសនា និងការទាមទារសិទ្ធិជនជាតិដើម ។
ក្នុងនោះ អាជ្ញាធរវៀតណាម បានចាប់ផ្សឹក និងដាក់ពន្ធនាគារព្រះសង្ឃខ្មែរក្រោមល្បីឈ្មោះជាច្រើនអង្គ ដូចជា ព្រះតេជព្រះគុណ ថាច់ ចន្ទតារា ព្រះចៅអធិការវត្តប្រជុំពលមង្គលបុរី ហៅវត្តទ្រនំសេក និងព្រះតេជព្រះគុណ យឿង ខាយ ដែលជាសកម្មជនសិទ្ធិមនុស្សខ្មែរក្រោមដ៏សកម្ម ជាដើម។ រីឯសកម្មជនខ្មែរក្រោមមួយចំនួនផ្សេងទៀត ក៏ត្រូវបានកាត់ទោសដាក់ពន្ធនាគារ ពាក់ព័ន្ធនឹងការផ្សព្វផ្សាយព័ត៌មានលើបណ្ដាញសង្គម ឬការតវ៉ាទាមទារសិទ្ធិសេរីភាពសាសនា និងសិទ្ធិដីធ្លី ។
អង្គការសិទ្ធិមនុស្សអន្តរជាតិ និងសហព័ន្ធខ្មែរកម្ពុជាក្រោម (KKF) តែងរិះគន់ជាបន្តបន្ទាប់ថា អាជ្ញាធរវៀតណាម ប្រើប្រាស់ច្បាប់សន្តិសុខ និងបទចោទពាក់ព័ន្ធនឹង «សន្តិសុខជាតិ» ឬ «រំលោភផលប្រយោជន៍រដ្ឋ» ដើម្បីបង្ក្រាបសំឡេងរិះគន់ និងសកម្មភាពរបស់ជនជាតិដើមខ្មែរក្រោម ។
ដោយឡែក រដ្ឋាភិបាលវៀតណាម តែងបដិសេធការចោទប្រកាន់ទាំងនេះ និងអះអាងថា ខ្លួនគោរពសិទ្ធិមនុស្ស និងសិទ្ធិសាសនារបស់ប្រជាពលរដ្ឋគ្រប់ជនជាតិ ស្របតាមច្បាប់វៀតណាម ៕
Leave a Reply