តំណាងសហព័ន្ធខ្មែរកម្ពុជាក្រោម (KKF) ដែលភាគច្រើនជាយុវជន កំពុងបន្តចូលរួមវេទិកាអចិន្ត្រៃយ៍អង្គការសហប្រជាជាតិ ស្ដីពីបញ្ហាជនជាតិដើម (UNPFII) នៅទីក្រុងញូវយ៉ក សហរដ្ឋអាមេរិក នឹងបន្តសកម្មភាពរយៈពេលមួយសប្តាហ៍បន្ថែមទៀត បន្ទាប់ពីបញ្ចប់កិច្ចប្រជុំក្នុងសប្តាហ៍ដំបូង ។
ក្នុងសប្តាហ៍ទី ១ តំណាងខ្មែរក្រោម បានឡើងថ្លែងការណ៍ចំនួនបីដង នៅក្នុងវេទិកានេះ ដោយលើកឡើងអំពីស្ថានភាពសិទ្ធិមនុស្ស និងបញ្ហាប្រឈមនានា ដែលប្រជាជាតិខ្មែរក្រោម កំពុងជួបប្រទះនៅកម្ពុជាក្រោម ។ ក្នុងសេចក្តីថ្លែងការណ៍ទាំងនោះ ពួកគេបានលាតត្រដាងអំពីការរឹតត្បិតសេរីភាពបញ្ចេញមតិ និងសេរីភាពសាសនា ការត្រួតពិនិត្យលើសកម្មភាពសង្គម និងសាសនា ជាករណីចាប់ខ្លួន និងផ្តន្ទាទោសសកម្មជន និងព្រះសង្ឃខ្មែរក្រោម ដែលពាក់ព័ន្ធនឹងការទាមទារសិទ្ធិជនជាតិដើម ។
បន្ថែមពីនេះ ពួកគេក៏បានលើកឡើងអំពីការរឹតត្បិតលើអត្តសញ្ញាណវប្បធម៌ និងភាសា ព្រមទាំងការលំបាកក្នុងការអនុវត្តសិទ្ធិជនជាតិដើម ស្របតាមសេចក្តីប្រកាស របស់អង្គការសហប្រជាជាតិ ស្តីពីសិទ្ធិជនជាតិដើម ។ តំណាងខ្មែរក្រោម បានអំពាវនាវឱ្យសហគមន៍អន្តរជាតិ និងយន្តការអង្គការសហប្រជាជាតិ បន្តតាមដាន និងជំរុញឱ្យរដ្ឋាភិបាលវៀតណាម គោរពសិទ្ធិមូលដ្ឋានរបស់របស់ប្រជាជាតិខ្មែរក្រោម ។
សម្រាប់សប្តាហ៍ទី២ ក្រុមយុវជនហព័ន្ធខ្មែរកម្ពុជាក្រោម គ្រោងនឹងបន្តលើកឡើងបញ្ហាដូចគ្នា និងពង្រីកការចូលរួមជាមួយតំណាងជនជាតិដើមពីប្រទេស និថតំបន់ផ្សេងៗ ដើម្បីបង្កើនការយល់ដឹង និងស្វែងរកការគាំទ្រពីអន្តរជាតិ ។
ការចូលរួមរបស់តំណាងខ្មែរក្រោម ក្នុងវេទិកានេះ ត្រូវបានមើលឃើញថា ជាវេទិកាសំខាន់សម្រាប់លើកសំឡេងរបស់ពលរដ្ឋខ្មែរក្រោមទៅកាន់សហគមន៍អន្តរជាតិ ។ ទន្ទឹមនឹងនេះ ពួកគេក៏បានអំពាវនាវឱ្យមានការគាំទ្រពីសប្បុរសជន ដើម្បីជួយផ្គត់ផ្គង់ធនធាន សម្រាប់បន្តបេសកកម្មនៅលើវេទិកាអន្តរជាតិ ៕
សម្រាប់ការគាំទ្រផ្នែកហិរញ្ញវត្ថុ តាមរយៈការបរិច្ចាគផ្ទាល់ខ្លួន សូមសប្បុរសជន ចុចតាមតំណភ្ជាប់ខាងក្រោម៖
👉 https://donorbox.org/support-kkf-youths-at-unpfii-2026-904537
Leave a Reply