តុលាការវៀតណាម នៅខេត្តលង់ហោរ (វិញឡុង) នៅព្រឹកថ្ងៃទី ២២ ខែមេសា បានកាត់ទោសសកម្មជនស្ត្រីខ្មែរក្រោមម្នាក់ គឺលោកស្រី ថាច់ ធី វ៉ារី អាយុ ៥៥ ឆ្នាំ ឱ្យជាប់ពន្ធនាគារ ៣ ឆ្នាំ ៦ ខែ ពីបទ «កេងចំណេញលើសិទ្ធិសេរីភាព និងលទ្ធិប្រជាធិបតេយ្យ» តាមមាត្រា ៣៣១ នៃ ក្រមព្រហ្មទណ្ឌវៀតណាម ។
អាជ្ញាធរវៀតណាមអះអាងថា ចាប់ពីឆ្នាំ ២០២១ មក អ្នកស្រីបានប្រើគណនីហ្វេសប៊ុក ដើម្បីបង្ហោះ និងចែករំលែកព័ត៌មានដែលពួកគេចាត់ទុកថា មិនពិត និងប៉ះពាល់ដល់អាជ្ញាធរ និងស្ថាប័នរដ្ឋ ។
មុនពេលត្រូវចាប់ខ្លួន លោកស្រី ថាច់ ធី វ៉ារី តែងប្រើបណ្តាញសង្គម ដើម្បីផ្សព្វផ្សាយអំពីសិទ្ធិមនុស្ស និងសិទ្ធិជនជាតិដើមខ្មែរក្រោម ព្រមទាំងបង្ហាញអត្តសញ្ញាណខ្មែរក្រោមតាមរយៈសកម្មភាពសង្គម និងព្រឹត្តិការណ៍សាធារណៈមួយចំនួន ដូចជា ទិវាសិទ្ធិមនុស្សអន្តរជាតិ ទិវាសិទ្ធិនារី និងសេចក្ដីប្រកាសរបស់អង្គការសហប្រជាជាតិ ស្ដីពីសិទ្ធិជនជាតិដើម ជាដើម ។
ករណីនេះ កើតឡើង ខណៈសកម្មជនខ្មែរក្រោមជាច្រើន ត្រូវបានអាជ្ញាធរវៀតណាមចាប់ខ្លួន និងផ្តន្ទាទោសជាបន្តបន្ទាប់ ពាក់ព័ន្ធនឹងសកម្មភាពបញ្ចេញមតិ និងការទាមទារសិទ្ធិ ។ អង្គការសិទ្ធិមនុស្សមួយចំនួនយល់ថា ជាការរឹតត្បិតសេរីភាពបញ្ចេញមតិ ខណៈរដ្ឋាភិបាលវៀតណាមបដិសេធការចោទប្រកាន់នេះ
Leave a Reply