លេខាធិការដ្ឋាន នៃ អង្គការ សមាគមខ្មែរកម្ពុជាក្រោម ដែលជាបណ្ដុំអង្គការ សមាគមខ្មែរកម្ពុជាក្រោម នៅកម្ពុជា ចំនួន ៩ នៅដើមខែកុម្ភៈឆ្នាំ ២០២៦ បានសរសេរញត្តិតាមរយៈសារអេឡិចត្រូនិកឬអ៊ីមែល ទៅកាន់ស្ថានទូតវៀតណាម ប្រចាំទីក្រុងភ្នំពេញរួចហើយ ផ្តោតសំខាន់ស្នើឱ្យរដ្ឋសភាវៀតណាមកែប្រែ (វិសោធនកម្មច្បាប់) ខ្លឹមសារក្រមព្រហ្មទណ្ឌ ត្រង់មាត្រា ៣៣១ ដែលមានលក្ខណៈរឹតបណ្ដឹងសេរីភាពសម្ដែងមតិ និងសិទ្ធិទទួលបានព័ត៌មាន ផ្ទុយពីកតិកាសញ្ញាស្ដីពីសិទ្ធិមនុស្សរបស់អង្គការសហប្រជាជាតិ ដែលប្រទេសវៀតណាម ជាម្ចាស់ហត្ថលេខី។
អនុប្រធានសមាគមខ្មែរកម្ពុជាក្រោម ដើម្បីសិទ្ធិមនុស្ស និងអភិវឌ្ឍន៍ បណ្ឌិត សឺន ជុំជួន មានប្រសាសន៍ថា ខ្លឹមសារញត្តិនេះ ដើម្បីស្វែងរកដំណោះស្រាយ ពាក់ព័ន្ធការរំលោភសិទ្ធិមនុស្ស សិទ្ធិទទួលបានជំនំជម្រះដោយយុត្តិធម៌ រក្សាអត្តសញ្ញាណជនជាតិដើមខ្មែរក្រោម ជាដើម។ លោកថា បញ្ហាទាំងនេះ ខ្មែរក្រោមកំពុងប្រឈម ហើយលោកបានស្នើទៅរដ្ឋាភិបាលវៀតណាម ដោះស្រាយ។
ស្នើសុំធ្វើវិសោធនកម្មលើមាត្រាពាក់ព័ន្ធ មានលក្ខណៈ រឹតបន្តឹងសេរីភាព ក្នុងការសម្ដែងមតិទទួលបានព័ត៌មានជាដើម ។ មាតាច្បាប់ខ្លះមិនឆ្លើយតបគោលការណ៍គោរពសិទ្ធិមនុស្ស និងមានភាពជាអធម្មនុញ្ញភាពលើរដ្ឋធម្មនុញ្ញរបស់វៀតណាមផង។ ចំណុចទី ២ យើងស្នើសុំឱ្យគណៈពុទ្ធសាសនាថេរវាទខ្មែរក្រោម មានលក្ខណៈដាច់ដោយឡែកពីសមាគមព្រះពុទ្ធសាសនាវៀតណាម។ លោក សឺន ជុំជួន អនុប្រធានសមាគមខ្មែរកម្ពុជាក្រោម ដើម្បីសិទ្ធិមនុស្ស និងអភិវឌ្ឍន៍
ខ្លឹមសារញត្តិ ៥ ចំណុចសំខាន់ៗ រួមមាន ទី១. ទទូចឱ្យរដ្ឋាភិបាលវៀតណាម អនុវត្តច្បាប់ឱ្យបានត្រឹមត្រូវ ពីនីតិវិធីក្នុងសវនាការ ចំពោះជនត្រូវចោទ ដែលជាពលរដ្ឋខ្មែរក្រោម ធ្វើយ៉ាងណាផ្តល់សិទ្ធិឱ្យពលរដ្ឋខ្មែរក្រោម ទទួលបានសិទ្ធិជំនំជម្រះក្តីដោយយុត្តិធម៌។ ទី២. គណៈពុទ្ធសាសនា ថេរវាទខ្មែរក្រោម ត្រូវនៅដាច់ដោយឡែក ឯករាជ្យពីសមាគមព្រះពុទ្ធសាសនាវៀតណាម។ ទី៣. វៀតណាមត្រូវទទួលស្គាល់ពលរដ្ឋខ្មែរក្រោម ជាជនជាតិដើម។ ទី៤. ត្រូវដោះលែងសកម្មជនខ្មែរក្រោមទាំងអស់ដែលកំពុងជាប់ពន្ធនាគារយ៉ាងអយុត្តិធម៌ និងទី០៥. ស្នើឱ្យរដ្ឋសភាវៀតណាម ធ្វើវិសោធនកម្មច្បាប់ (កែប្រែ) ខ្លឹមសារក្រមព្រហ្មទណ្ឌត្រង់មាត្រា ៣៣១ ដែលមានលក្ខណៈរឹតបណ្ដឹងសេរីភាពសម្ដែងមតិ និងសេរីភាពទទួលបានព័ត៌មាន បំពានច្បាប់អន្តរជាតិ និងកតិកាសញ្ញាស្ដីពីសិទ្ធិមនុស្សរបស់អង្គការសហប្រជាជាតិ ដែលប្រទេសវៀតណាម ជាហត្ថលេខី។
ពលរដ្ឋខ្មែរក្រោម លោក ថាច់ ថាញ់ ស្នើឱ្យអង្គការសហប្រជាជាតិ ជួយអន្តរាគមន៍ឱ្យរដ្ឋាភិបាលវៀតណាមគោរពសិទ្ធិពលរដ្ឋខ្មែរក្រោម និងត្រូវដោះលែងព្រះសង្ឃ និងសកម្មជនខ្មែរក្រោម ដែលវៀតណាមជាប់ដាក់ពន្ធនាគារដោយអយុត្តិធម៌។
បន្ថែមពីនេះ លោកទទូចឱ្យអង្គការសហប្រជាជាតិអន្តរាគមន៍ឱ្យរដ្ឋាភិបាលវៀតណាម ផ្តល់សេរីភាពអប់រំ ឬបើកសាលាបង្រៀនប្រវត្តិសាស្ត្រ ភូមិសាស្ត្រខ្មែរ ដើម្បីឱ្យកូនខ្មែរសិក្សាពីប្រវត្តិសាស្ត្រ និងភូមិសាស្ត្រជាតិឯង៖
អាជ្ញាធរវៀតណាម បង្ខំឱ្យយើងទទួលកំហុសរំលោភលើសិទ្ធិយើងទាំងស្រុងតែម្តងបើមិនព្រមគ្រាន់ចុះស៊ីញេហើយ វារំលោភសិទ្ធិយើងតែម្តង រំលោភសិទ្ធិ។ ចំណែកបើកបង្រៀនភាសាខ្មែរវប្បធម៌ ទំនៀមទម្លាប់របស់ជាតិនៅតែធម្មតា។ សូម្បីតែស្នើដល់អង្គការសហប្រជាជាតិ ឱ្យខ្មែរក្រោមមានសិទ្ធិបើកសាលារៀន ឱ្យកូនខ្មែរជំនាន់ក្រោយដឹងពីប្រវត្តិសាស្ត្រជាតិឯង។ លោក ថាច់ ថាញ់ ពលរដ្ឋខ្មែរក្រោម នៅខេត្តលង់ហោរ
ចាប់តាំងពីឆ្នាំ ២០២៣ រហូតមកទល់ពេលនេះ ព្រះសង្ឃ និងសកម្មជនសិទ្ធិមនុស្សខ្មែរក្រោមយ៉ាងហោចណាស់ ១៧ អង្គ/នាក់ ត្រូវអាជ្ញាធរវៀតណាម ចាប់ផ្សឹក និងដាក់ពន្ធនាគារយ៉ាងអយុត្តិធម៌។ អង្គការសមាគមខ្មែរកម្ពុជាក្រោម ចាត់ទុកអាជ្ញាធរវៀតណាមជាការគំរាមកំហែងស្មារតីពលរដ្ឋខ្មែរក្រោម។
ខ្លឹមសារញត្តិបន្ថែមថា សកម្មជនសិទ្ធិមនុស្សខ្មែរក្រោម ដែលត្រូវបានរដ្ឋអំណាច និងតុលាការ នៃសាធារណរដ្ឋសង្គមនិយមវៀតណាម ផ្ដន្ទាទោស ហើយបញ្ជូនទៅឃុំខ្លួនក្នុងពន្ធនាគារ ជាច្រើននាក់ គឺជាជនរងគ្រោះ និងគ្មានកំហុស ដោយពួកគេគ្រាន់តែទាមទារសេរីភាព ក្នុងនាមជាជនជាតិដើម នៅក្រោមការគ្រប់គ្រងរបស់វៀតណាម។
ការទាមទាររបស់ពលរដ្ឋខ្មែរក្រោមស្របទៅតាមសេចក្ដីប្រកាសជាសកល ស្ដីពីសិទ្ធិមនុស្ស សេចក្ដីប្រកាសស្ដីពីសិទ្ធិជនជាតិដើម និងសេចក្ដីប្រកាសជាសកលស្ដីសិទ្ធិ នារី និងសិទ្ធិកុមាររបស់អង្គការ សហប្រជាជាតិ (UN)៕
Leave a Reply