ពលរដ្ឋខ្មែរក្រោមជិត ១០០ នាក់ នៅថ្ងៃទី ២៩ មេសា បានលើកគ្នាតវ៉ា និងដាក់ញត្តិទៅស្ថានទូតវៀតណាម និងស្ថានទូតបណ្ដាប្រទេសប្រជាធិបតេយ្យ នៅរាជធានីភ្នំពេញ ដើម្បីទាមទារ និងអន្តរាគមន៍ឱ្យរដ្ឋាភិបាលវៀតណាមដោះលែងព្រះសង្ឃ និងពលរដ្ឋខ្មែរក្រោម ១៦ អង្គ/នាក់ ដែលអាជ្ញាធរវៀតណាមក្នុងខេត្តព្រះត្រពាំង បានចាប់ខ្លួនពួកគាត់ កាលពីថ្ងៃទី ២៧ មីនាកន្លងទៅ ។ ពួកគេចាត់ទុកការចាប់ខ្លួននេះ ជារឿងនយោបាយ ដើម្បីគាបសង្កត់សេរីភាពពលរដ្ឋខ្មែរក្រោម ។
មនុស្សជិត ១០០នាក់ រួមមានព្រះសង្ឃ និងពលរដ្ឋខ្មែរក្រោម បានមកជួបជុំគ្នា នៅទីស្នាក់ការសមាគមខ្មែរកម្ពុជាក្រោម ដើម្បីសិទ្ធិមនុស្ស និងអភិវឌ្ឍន៍ រាជធានីភ្នំពេញ ដើម្បីលើកបដាតវ៉ា តស៊ូមតិទាមទារឱ្យរដ្ឋាភិបាលវៀតណាមគោរពសិទ្ធិជនជាតិដើម សេរីភាពខាងសាសនា និងការអភិរក្សវប្បធម៌របស់ពលរដ្ឋខ្មែរក្រោម ។
ពួកគាត់បានដង្ហែញត្តិទៅកាន់ក្រសួងការបរទេស និងសហប្រតិបត្តិការអន្តរជាតិ ដើម្បីឱ្យក្រសួងមួយនេះ បញ្ចូនញត្តិរបស់ពួកគាត់ទៅស្ថានទូតសាធារណរដ្ឋ សង្គមនិយមវៀតណាម ស្ថានទូតអូស្ត្រាលី ស្ថានទូតសហរដ្ឋអាមេរិក ស្ថានទូតសហភាពអឺរ៉ុប និងការិយាល័យ ឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា ក្នុងបំណងឱ្យប្រទេសមហាអំណាចទាំងនេះ ជួយអន្តរាគមន៍ទៅរដ្ឋាភិបាលសាធារណរដ្ឋសង្គមនិយមវៀតណាម ។
អគ្គលេខាធិការ នៃ សមាគមខ្មែរកម្ពុជាក្រោម ដើម្បីសិទ្ធិមនុស្ស និងអភិវឌ្ឍន៍ បណ្ដិត សឺន ជុំជួន សង្ឃឹមថា ស្ថានទូតប្រទេសមហាអំណាច និងអង្គការសហប្រជាជាតិនឹងចាប់អារម្មណ៍ពីបញ្ហានេះ ហើយជួយអន្តរាគមន៍ទៅរដ្ឋាភិបាលវៀតណាមឱ្យពិចារណាដោះលែងព្រះសង្ឃ និងពលរដ្ឋខ្មែរក្រោម ១៦ អង្គ/នាក់ ដែលកំពុងជាប់ឃុំឃាំងយ៉ាងអយុត្តិធម៌។ លោកសង្ឃឹមថា រដ្ឋាភិបាលកម្ពុជានឹងមិននៅស្ងៀមឡើយបញ្ហានេះ ស្របពេលដែលរដ្ឋាភិបាលវៀតណាមតែងតែអំពាវនាវឱ្យរដ្ឋាភិបាលកម្ពុជាយកចិត្តទុកដាក់ ការពារសិទ្ធិពលរដ្ឋវៀតណាមដែលកំពុងរស់នៅប្រទេសកម្ពុជា ។
លោកប្រកាសជំហរថា នឹងបន្តតស៊ូមតិគ្រប់រូបភាព ដើម្បីស្នើសុំឱ្យ រដ្ឋាភិបាលវៀតណាមបញ្ឈប់ការរំលោភបំពានសិទ្ធិសេរីភាពព្រះសង្ឃ និងពលរដ្ឋខ្មែរក្រោម ។
ខ្លឹមសារញត្តិ ០៤ ទំព័រ របស់សមាគមខ្មែរកម្ពុជាក្រោមថ្កោលទោសយ៉ាងដាច់អហង្ការចំពោះអាជ្ញាធរវៀតណាមនៅខេត្តព្រះត្រពាំង បានចាប់ផ្សឹក និងចាប់ខ្លួនព្រះតេជគុណ គឹម សំរិន្ទ ដែលជាព្រះសង្ឃខ្មែរក្រោមជាទីគោរព ព្រមទាំងចាប់ខ្លួនសកម្មជនលេចធ្លោពីររូបទៀត គឺលោក ថាច់ ង៉ា និង ថាច់ ស្វឹង ដុង ។ ព្រះសង្ឃ និងពលរដ្ឋខ្មែរក្រោមដែលអាជ្ញាធរវៀតណាមចាប់ខ្លួន ក្រោមការចោទប្រកាន់មិនច្បាស់លាស់ និងមានចរិតនយោបាយ «កេងចំណេញលើសិទ្ធិសេរីភាព និងលទ្ធិប្រជាធិបតេយ្យ» តាមមាត្រា ៣៣១ នៃក្រមព្រហ្មទណ្ឌវៀតណាម ។ ការចាប់ខ្លួននេះជារូបភាពមួយ ក្នុងចំណោមការគាបសង្កត់សេរីភាពរបស់រដ្ឋាភិបាលវៀតណាមជាច្រើនទៀត ។
ខ្លឹមសារញត្តិបន្តថា ការចាប់ផ្សឹក ការឃុំខ្លួន ការបណ្តេញព្រះសង្ឃចេញពីវត្ត និងការរុះរើសំណង់សាលាឆទានខ្មែរក្រោម ជាទង្វើរំលោភសិទ្ធិមនុស្សធ្ងន់ធ្ងរ រំលោភសេរីភាពបញ្ចេញមតិ សេរីភាពចួបប្រជុំដោយសន្តិវិធី សេរីភាពចែករំលែកព័ត៌មាន និងសេរីភាពជំនឿសាសនា ដែលជាសេរីភាពមូលដ្ឋានរបស់ជនជាតិដើម និងសិទ្ធិមនុស្សសកល ។
លើសពីនេះទៀតសកម្មភាពគាបសង្កត់របស់វៀតណាមមកលើខ្មែរក្រោមនៅពេលនេះ គឺជាការសងសឹករបស់ពួកគេលើព្រះសង្ឃ និងសកម្មជនខ្មែរក្រោម ដែលតស៊ូផ្សព្វផ្សាយ និងលើកកម្ពស់គោលការណ៍សិទ្ធិមនុស្ស និងសិទ្ធិជនជាតិដើម ។ រដ្ឋាភិបាលវៀតណាមត្រូវទទួលខុសត្រូវ ខណៈខ្លួនក៏ជាម្ចាស់ហត្ថលេខីនៃសេចក្តីប្រកាសជាសកលស្តីពីសិទ្ធិមនុស្ស សេចក្តីថ្លែងការណ៍អង្គការសហប្រជាជាតិស្តីពីសិទ្ធិជនជាតិដើម និងក្រុមប្រឹក្សាសិទ្ធិមនុស្ស ។
ខ្លឹមសារញត្តិសង្កត់ធ្ងន់ថា វៀតណាមត្រូវដោះលែងព្រះសង្ឃ និងសកម្មជនខ្មែរក្រោមទាំង ១៦ អង្គ/នាក់ ដែលកំពុងជាប់ឃុំជាបន្ទាន់ និងដោយគ្មានលក្ខខណ្ឌ។ អាជ្ញាធរវៀតណាមក្នុងខេត្តព្រះត្រពាំង ត្រូវអនុញ្ញាត និងទទួលស្គាល់ព្រះសង្ឃឡើងវិញ ចំពោះព្រះតេជគុណ គឹម សំរិន។ អាជ្ញាធរវៀតណាមក្នុងខេត្តលង់ហោរត្រូវតែសាងសង់សាលាឆទាន ដែលបានរុះរើឡើងវិញ ដើម្បីឲ្យពុទ្ធសាសនិកខ្មែរក្រោម អនុវត្តជំនឿរបស់ពួកគេ ។
មកទល់ពេលបច្ចុប្បន្ននេះ មានព្រះសង្ឃ ៦ អង្គ និងសកម្មជនខ្មែរក្រោម ១០ នាក់ ត្រូវបានតុលាការវៀតណាមកាត់ទោសដាក់ពន្ធនាគារជាច្រើនឆ្នាំ ដោយសារតែពួកគេទាមទារសិទ្ធិជនជាតិដើម និងសាសនា។ អាជ្ញាធរវៀតណាម ចោទប្រកាន់ពីបទចោទស្រដៀងៗគ្នា គឺ «កេងចំណេញលើសិទ្ធិសេរីភាព និងលទ្ធិប្រជាធិបតេយ្យ បំពានលើផលប្រយោជន៍របស់រដ្ឋ និងសិទ្ធិសេរីភាពស្របច្បាប់នៃអង្គការចាត់តាំង និងបុគ្គល» និងបទ «ការចាប់ខ្លួនឃាត់ខ្លួន ឬឃុំខ្លួនមនុស្សដោយខុសច្បាប់» តាមក្រមព្រហ្មទណ្ឌវៀតណាម ៕
អត្ថបទដោយ លោក ម៉ែន ចន្ធី
Leave a Reply