អង្គការការពារសិទ្ធិមនុស្សខ្មែរកម្ពុជាក្រោម គ្រោងនឹងដាក់ពាក្យទៅកាន់អង្គការសហប្រជាជាតិ ដើម្បីតវ៉ាមិនឲ្យវៀតណាមឈរ ឈ្មោះជាបេក្ខភាពសមាជិកក្រុមប្រឹក្សាសិទ្ធិមនុស្ស របស់អង្គការសហប្រជាជាតិ ដោយសារតែរដ្ឋាភិបាលកុម្មុយនីស្តវៀតណាម បន្តធ្វើទុក្ខបុកម្នេញជនជាតិដើមខ្មែរក្រោម។
ស្របពេលដែលវៀតណាម ប្រកាសចង់ដាក់ពាក្យបន្តជាសមាជិកប្រឹក្សាសិទ្ធិមនុស្ស អង្គការសហប្រជាជាតិសម្រាប់អាណត្តិពីរឆ្នាំពីឆ្នាំ២០២៦ ដល់ឆ្នាំ ២០២៨នោះ សហព័ន្ធខ្មែរកម្ពុជាក្រោម ដែលមានមូលដ្ឋាននៅសហរដ្ឋអាមេរិក ប្រកាសនឹងប្តឹងតវ៉ាទៅសហគមន៍អន្តរជាតិ ដើម្បីកុំឲ្យគាំទ្រវៀតណាម បន្តជាសមាជិកប្រឹក្សាសិទ្ធិមនុស្សអង្គការ សហប្រជាជាតិបន្តទៀត។ បច្ចុប្បន្ន វៀតណាមបានក្លាយជាសមាជិកប្រឹក្សាសិទ្ធិមនុស្សអង្គការសហប្រជាជាតិ ចាប់ពីឆ្នាំ ២០១៤ ហើយនឹងផុតអាណត្តិនៅឆ្នាំ ២០២៥នេះ។
- វៀតណាមបន្តធ្វើទុក្ខបុកម្នេញព្រះសង្ឃនិងសកម្មជនសិទ្ធិកម្ពុជាក្រោម
នាយកគណៈកម្មការព័ត៌មាន នៃ សហព័ន្ធខ្មែរកម្ពុជាក្រោម ព្រះតេជព្រះគុណ សឹង យ៉ឹងរតនា មានថេរដីកាថា ទោះបីវៀតណា មក្នុងឋានៈជាសមាជិកក្រុមប្រឹក្សាសិទ្ធិមនុស្សអង្គការសហប្រជាជាតិ ប៉ុន្តែ រដ្ឋាភិបាលកុម្មុយនីស្តវៀតណាមមួយនេះ បន្តធ្វើទុក្ខបុកម្នេញព្រះសង្ឃ និងសកម្មជនសិទ្ធិមនុស្សខ្មែរក្រោម។
សហព័ន្ធខ្មែរកម្ពុជាក្រោម គ្រោងនឹងដាក់ញត្តិទៅសហគមន៍អឺរ៉ុប និងក្រុមប្រឹក្សាសិទ្ធិមនុស្សអន្តរជាតិ កុំឲ្យបោះឆ្នោតឲ្យប្រទេសវៀតណាម ឈរឈ្មោះជាប្រធានក្រុមប្រឹក្សាសិទ្ធិមនុស្សអង្គការសហប្រជាជាតិ ពីព្រោះប្រទេសវៀតណាម មិនគោរពសិទ្ធិមនុស្សខ្មែរកម្ពុជាក្រោម។ — ព្រះតេជព្រះគុណ សឹង យ៉ឹងរតនា នាយកគណៈកម្មការព័ត៌មាននៃសហព័ន្ធខ្មែរកម្ពុជាក្រោម
កាលពីសប្តាហ៍មុន សហភាពអឺរ៉ុបក្នុងកិច្ចប្រជុំសមាជិកក្រុមប្រឹក្សាសិទ្ធិមនុស្សអង្គការសហប្រជាជាតិ បានរិះគន់វៀតណាម ប្រឆាំងនឹងការចាប់ខ្លួនរបស់អ្នកធ្វើយុទ្ធនាការសិទ្ធិមនុស្ស សិទ្ធិការងារ និងអ្នកជំនាញបរិស្ថាន។ តំណាងសហភាពអឺរ៉ុបប្រាប់កិច្ចប្រជុំលើកទី៥៨ នៃក្រុមប្រឹក្សាសិទ្ធិមនុស្សអង្គការសហប្រជាជាតិ នៅទីក្រុងហ្សឺណែវ ថា រដ្ឋាភិបាលទីក្រុងហាណូយ គួរតែដោះលែងប្រជាជន ដែលអាជ្ញាធរវៀតណាម បានហាមឃាត់មិនឲ្យអនុវត្តសិទ្ធិជាមូលដ្ឋានរបស់ពួកគាត់។
- ខ្មែរក្រោយជាង១០នាក់ត្រូវវៀតណាមចាប់ខ្លួន
បច្ចុប្បន្នវៀតណាម បានចាប់ព្រះសង្ឃខ្មែរក្រោម ៥អង្គ និងសកម្មជនសិទ្ធិមនុស្សខ្មែរក្រោម ៨នាក់ ដោយសារតែព្រះសង្ឃទាមទារសិទ្ធិសាសនា ខណៈសកម្មជនខ្មែរក្រោមទាមទារសិទ្ធិជនជាតិដើម។
ឯកអគ្គរដ្ឋទូត អ្នកស្រី ឡ៉ត ខ្នូតសិន (Lotte Knudsen) ប្រធានគណៈប្រតិភូសហភាពអឺរ៉ុបប្រចាំអង្គការសហប្រជាជាតិ មានប្រសាសន៍ថា អឺរ៉ុបព្រួយបារម្ភចំពោះការចាប់ខ្លួនអ្នកការពារសិទ្ធិមនុស្ស ក៏ដូចជាសិទ្ធិការងារ អ្នកជំនាញបរិស្ថាននៅក្នុងប្រទេសវៀតណាម ដែលជះឥទ្ធិពលយ៉ាងខ្លាំងដល់សេរីភាពនៃការបញ្ចេញមតិ ការជួបប្រជុំ និងសមាគម”។
យើងអំពាវនាវឱ្យវៀតណាមធានាថា សិទ្ធិមនុស្ស និងសេរីភាពជាមូលដ្ឋានត្រូវបានគេការពារ ដូច្នេះសង្គមស៊ីវិលអាចចូលរួមដោយសេរីក្នុងគ្រប់ទិដ្ឋភាពនៃការអភិវឌ្ឍ ដោយមិនមានការយាយី ការបំភិតបំភ័យ និងការសងសឹក ហើយដោះលែងអ្នកជាប់ឃុំទាំងអស់ដែលបានបង្ហាញទស្សនៈរបស់ពួកគេដោយសន្តិវិធី។ — ឯកអគ្គរដ្ឋទូត អ្នកស្រី ឡ៉ត ខ្នូតសិន ប្រធានគណៈប្រតិភូសហភាពអឺរ៉ុបប្រចាំអង្គការសហប្រជាជាតិ
កាលពីឆ្នាំ ២០១៩ អឺរ៉ុប និងវៀតណាម បានចុះហត្ថលេខាលើកិច្ចព្រមព្រៀងពាណិជ្ជកម្មសេរី EU-Vietnam។ កិច្ចព្រមព្រៀងនេះ បានជួយវៀតណាម ឱ្យក្លាយជាប្រទេសនាំចេញធំបំផុត នៅអាស៊ីអាគ្នេយ៍ទៅអឺរ៉ុប។
កាលពីឆ្នាំ២០២៤ វៀតណាមបានធ្វើពាណិជ្ជកម្មជាមួយ ២៧ ប្រទេសជាសមាជិកអឺរ៉ុបមានទំហំទឹកប្រាក់ដល់ ៣៥ ពាន់លានដុល្លារ។
ទោះបីជាយ៉ាងណាកិច្ចព្រមព្រៀងវៀតណាម និងអឺរ៉ុបតម្រូវឲ្យវៀតណាមប្ដេជ្ញាចិត្តក្នុងការការពារសិទ្ធិកម្មករ និងសិទ្ធិដីធ្លី និងការពារបរិស្ថាន។ ប៉ុន្តែកាលពីថ្ងៃទី៤ ខែកុម្ភៈ ក្រុមសិទ្ធិមនុស្សចំនួនបួននៅអឺរ៉ុប និងសហរដ្ឋអាមេរិកបានដាក់ពាក្យបណ្តឹងទៅ នាយកដ្ឋានពាណិជ្ជកម្មរបស់គណៈកម្មការអឺរ៉ុប ដោយចោទប្រកាន់វៀតណាមថាបានរំលោភលើការសន្យាទាំងនោះ។
ជុំវិញរឿងនេះ នាយកគណៈកម្មការព័ត៌មាននៃសហព័ន្ធខ្មែរកម្ពុជាក្រោម ព្រះតេជព្រះគុណ សឹង យ៉ឹងរតនា សង្ឃឹមថា សហភាពអឺរ៉ុប នឹងមានឥទ្ធិពលលើវៀតណាម ដោយសារតែវៀតណាម ត្រូវការប្រទេសលោកខាងលិច ជាពាណិជ្ជកម្មជាមួយ។
និយាយរួមទៅសភាអឺរ៉ុប គេបានអំពាវនាវទៅរដ្ឋាភិបាលវៀតណាម ត្រូវតែគោរពសិទ្ធិចំពោះពលរដ្ឋនៅវៀតណាម ក្នុងនោះក៏មានពលរដ្ឋខ្មែរក្រោមជាដើម។ យើងសង្ឃឹមថា រដ្ឋាភិបាលវៀតណាម មិនអាចកុហកអន្តរជាតិម្តងហើយម្តងទៀតបានទេ។ — ព្រះតេជព្រះគុណ សឹង យ៉ឹង រតនា នាយកគណៈកម្មការព័ត៌មាននៃសហព័ន្ធខ្មែរកម្ពុជាក្រោម
បច្ចុប្បន្ន សហព័ន្ធខ្មែរកម្ពុជាក្រោម កំពុងធ្វើយុទ្ធនាការអន្តរជាតិ ដើម្បីកៀងគរការគាំទ្រពីអន្តរជាតិ ដើម្បីទាមទារឲ្យវៀតណាមដោះលែងព្រះសង្ឃ ៥អង្គ និងសកម្មជនសិទ្ធិមនុស្សខ្មែរក្រោម ៨នាក់ ដែលកំពុងជាប់ពន្ធនាគារ ក្នុងនោះ ព្រះភិក្ខុ ថាច់ ច័ន្ទតារា ព្រះចៅអធិការវត្តមណ្ឌលបុរីទ្រនំសេក ត្រូវវៀតណាមចាប់ដាក់ពន្ធនាគារ ៦ឆ្នាំ៕
Leave a Reply