នៅថ្ងៃទី១៤ ខែតុលា ឆ្នាំ២០២៥នេះ អង្គការ សមាគមខ្មែរកម្ពុជាក្រោម បានដាក់ញត្តិទៅកាន់ប្រទេសសមាជិកអាស៊ាន ដើម្បីស្នើសុំកិច្ចអន្តរាគមន៍លើករណីអាជ្ញាធរវៀតណាម ចាប់ព្រះសង្ឃ និងសកម្មជនខ្មែរក្រោម ចំនួន ១៦អង្គ/ នាក់ដាក់ពន្ធនាគារ។ បើតាមអង្គការសមាគមខ្មែរកម្ពុជាក្រោម ញត្តិនេះធ្វើឡើងស្របពេលដែលតំណាងសមាគមខ្មែរកម្ពុជាក្រោម ចូលរួមសន្និសីទសង្គមស៊ីវិលអាស៊ាន និងវេទិកាពលរដ្ឋអាស៊ាន ចាប់ពីថ្ងៃទី១៤ ដល់ថ្ងៃទី១៥ ខែតុលា ឆ្នាំ២០២៥ នៅប្រទេសម៉ាឡេស៊ី។
ក្រៅពីស្នើឱ្យដោះលែងព្រះសង្ឃ និងសកម្មជនខ្មែរក្រោមចំនួន១៦អង្គ/នាក់ អង្គការសមាគមខ្មែរកម្ពុជាក្រោម ក៏បានទទូចឱ្យបណ្តាប្រទេសក្នុងតំបន់អាស៊ានជួយអន្តរាគមន៍ទៅកាន់រដ្ឋាភិបាលវៀតណាម ឱ្យបញ្ឈប់ការធ្វើទុក្ខបុកម្នេញទៅលើពលរដ្ឋខ្មែរក្រោម។ ទន្ទឹមគ្នានេះ អង្គការសមាគមខ្មែរកម្ពុជាក្រោម ចង់ឃើញអគ្គលេខាធិការអាស៊ាន និងតំណាងគណៈកម្មការអន្តររដ្ឋាភិបាលអាស៊ានទទួលបន្ទុកសិទ្ធិមនុស្ស (AICHR) ផ្ញើញត្តិនេះទៅកាន់រដ្ឋាភិបាលវៀតណាមដើម្បីលើកយកករណីនេះទៅដោះស្រាយ។
អង្គការសមាគមខ្មែរកម្ពុជាក្រោម បានសង្កត់ធ្ងន់ថា អាជ្ញាធរវៀតណាមបានរំលោភយ៉ាងធ្ងន់ធ្ងរដល់សេរីភាពក្នុងការបញ្ចេញមតិ សេរីភាពសាសនា ព្រមទាំងសេរីភាពនៃការប្រើប្រាស់ភាសាដើមរបស់ពលរដ្ឋខ្មែរក្រោម។ ការណ៍នេះ គឺផ្ទុយទាំងស្រុងនឹងច្បាប់សកលស្តីពីសិទ្ធិមនុស្ស។ អ្វីដែលអង្គការសមាគមខ្មែរកម្ពុជាក្រោមទាមទារ គឺចង់ឃើញអាជ្ញាធរវៀតណាមដោះលែងជាបន្ទាន់ និងឥតលក្ខខណ្ឌនូវសកម្មជន និងព្រះសង្ឃទាំង ១៦អង្គ/នាក់ សាងសង់វត្តអារាម ដែលខូចខាតឡើងវិញ និងជាពិសេស គឺគោរពសេរីភាពផ្នែកសាសនា និងសេរីភាពរបស់ជនជាតិដើមភាគតិច។
គួរជ្រាបថា នេះមិនមែនជាលើកទី១ទេ ដែលអង្គការសមាគមខ្មែរកម្ពុជាក្រោមដាក់ញត្តិស្វែងរកជំនួយពីបណ្តាប្រទេស និងស្ថាប័ននានា។ កាលពីអំឡុងខែមេសា ឆ្នាំ២០២៥ អង្គការដែលមានស្នាក់ការនៅទីក្រុងភ្នំពេញមួយនេះ បានដាក់ញត្តិទៅបណ្តាស្ថានទូត និងស្ថាប័នអន្តរជាតិដើម្បីឱ្យអាជ្ញាធរវៀតណាមដោះលែងព្រះសង្ឃ និងពលរដ្ឋខ្មែរក្រោមដែលកំពុងជាប់ឃុំ។ គួររម្លឹកថា អាជ្ញាធរវៀតណាមបានចាប់ខ្លួនសកម្មជន និងព្រះសង្ឃទាំង ១៦អង្គ/នាក់ ក្នុងចន្លោះឆ្នាំ២០២៣ ដល់ឆ្នាំ២០២៤ ក្រោមបទចោទប្រកាន់ «កេងចំណេញលើសិទ្ធិសេរីភាព និងលទ្ធិប្រជាធិបតេយ្យ និងការចាប់ឃាត់ខ្លួនមនុស្សដោយខុសច្បាប់»។
ក្នុងឆ្នាំ២០២៤ ប្រមុខគណបក្សកាន់អំណាច លោក ហ៊ុន សែន បានស្នើដោយត្រង់ទៅកាន់ភាគីវៀតណាម ឲ្យយកចិត្តទុកដាក់លើទំនៀមទម្លាប់រស់នៅរបស់ពលរដ្ឋខ្មែរកម្ពុជាក្រោម ដែលស្ថិតក្រោមការគ្រប់គ្រងរបស់វៀតណាម។ សំណើរបស់លោកហ៊ុន សែនដូចនេះ ធ្វើឡើងដោយលោកមើលឃើញថា ពលរដ្ឋខ្មែរក្រោមបានគោរព និងអនុវត្តយ៉ាងខ្ជាប់ខ្ជួននូវច្បាប់ និងបទបញ្ញត្តិនានារបស់អាជ្ញាធរវៀតណាម៕
Leave a Reply