ព្រះសង្ឃ និងពុទ្ធបរិស័ទខ្មែរក្រោម ធ្វើពិធីបង្សុកូល រំលឹកខួប១ខែ ដែលអាជ្ញាធរវៀតណាម ខេត្តលង់ហោរ វាយកម្ទេចសាលាឆទាននៅភូមិកន្រែង។ ពួកគាត់ថា ការធ្វើពិធីនេះ ដើម្បីបង្ហាញពីការប្រឆាំងទៅនឹងទង្វើរបស់អាជ្ញាធរវៀតណាម បន្តធ្វើទុក្ខបុកម្នេញ មកលើពលរដ្ឋខ្មែរក្រោម។
ព្រះសង្ឃ និងពុទ្ធបរិស័ទ ប្រមាណ១០អង្គ-នាក់ ធ្វើពិធីបង្សុកូល រំលឹកខួប១ខែ ដែលអាជ្ញាធរវៀតណាម ប្រើគ្រឿងចក្រឈូសកម្ទេចសាលាឆទាន នៅខេត្តលង់ហោរ។ សាលាឆទាននោះ ផ្ដួចផ្ដើមគំនិត សាងសង់ដោយ ព្រះចៅអធិការវត្តប្រជុំពលមង្គលបូរី ហៅវត្តទ្រនំសេក ព្រះតេជព្រះគុណ ថាច់ ចន្ទតារា និងពលរដ្ឋខ្មែរក្រោម នៅភូមិកន្រែង ប៉ុន្តែ ត្រូវបានអាជ្ញាធរ វៀតណាមឈូសកម្ទេច កាលពីថ្ងៃទី១ មេសា។
ពលរដ្ឋខ្មែរក្រោម រស់នៅភូមិកន្រែង ឃុំកំពង់ស្រុកផ្សាថ្មី ខេត្តលង់ហោរ លោក ថាច់ ថាន់ ប្រាប់វិទ្យុអាស៊ីសេរី នៅថ្ងៃទី២ ខែឧសភាថា ពុទ្ធបរិស័ទ ជាង១០នាក់ នៅថ្ងៃទី០១ ខែឧសភា បានចូលរួម ធ្វើពិធីបង្សុកូល រំលឹកខួប១ខែ ដែលអាជ្ញាធរវៀតណាម ប្រើគ្រឿងចក្រឈូសកម្ទេចសាលាឆទាន។ លោក ថាច់ ថាន់ បញ្ជាក់ថា ការធ្វើពិធីនេះ ក៏មានការឃ្លាំមើល និងគំរាមកំហែងតាមពាក្យសម្ដី ពីសំណាក់អាជ្ញាធរវៀតណាមផងដែរ ប៉ុន្តែ ពលរដ្ឋពុំភ័យខ្លាចនោះឡើយ។
លោក ថាច់ ថាន់៖ «បើទោះបីវៀតណាមព្យាយាមបំផ្លិចបំផ្លាញយ៉ាងណាក៏ដោយ គឺក្រុមខ្មែរ ក្រោមយើងខ្ញុំនៅតែ ប្ដូរផ្ដាច់ ដើម្បី ពង្រីកឱ្យបាននូវវប្បធម៌ជាតិ ។ ឥឡូវនៅកន្លែង សាលាឆទានអត់មាន កន្លែង ក្មេងសិក្សា អក្សរសាស្ត្រទៀតទេ ពីរោះត្រូវបានអាជ្ញាធរវៀតណាមកម្ទេចចោល»។ លោក ថាច់ ថាន់ ពលរដ្ឋខ្មែរក្រោម រស់នៅភូមិកន្រែង ឃុំកំពង់ស្រុកផ្សាថ្មី ក្នុងខេត្តលង់ហោរ
លោកបានរលឹកថា សាលាឆទាននេះ កាលពីមិនទាន់ត្រូវបានកម្ទេចចោលពីសំណាក់អាជ្ញាធរវៀតណាម ព្រះសង្ឃ និងពលរដ្ឋខ្មែរក្រោម តែងតែមកជួបគ្នាធ្វើបុណ្យទាន តាមបែបប្រពៃណីខ្មែរ និងជាកន្លែងបង្រៀនភាសាខ្មែរ ដល់កុមារ និងយុវជនខ្មែរក្រោម។ ចំណែក រដ្ឋាភិបាលវៀតណាម មិនសប្បាយចិត្ត ទៅនឹងសកម្មភាពទាំងនេះទេ ហើយតែងរារាំងខ្មែរក្រោម មិនឱ្យមានឱកាសរៀនសូត្រ អំពីព្រះពុទ្ធសាសនា ទំនៀមទម្លាប់ និងប្រពៃណីខ្មែរ។
ពលរដ្ឋខ្មែរក្រោមភាគច្រើន ទទូចឱ្យរដ្ឋាភិបាលខ្មែរ គួរតែ គិតគូរ ពីទុក្ខលំបាក របស់ពួកគាត់ ហើយជួ អន្តរាគមន៍ដល់អាជ្ញាធរវៀតណាម ឱ្យបញ្ឈប់ការរឹតត្បិត ដោយដោះលែងសកម្មជនខ្មែរក្រោមឱ្យមានសេរីភាព និងបើកសេរីភាព ឱ្យពលរដ្ឋខ្មែរ ក្រោមរៀនសូត្រអក្សរខ្មែរ និងរក្សាទំនៀមទម្លាប់ប្រពៃណី ដូចដើមឡើងវិញ។
វិទ្យុអាស៊ីសេរី មិនទាន់អាចទាក់ទងស្ថានទូតវៀតណាមប្រចាំនៅកម្ពុជា និងប្រធានអង្គភាព អ្នកនាំពាក្យរដ្ឋាភិបាល លោក ប៉ែន ប៉ូណា ដើម្បីឆ្លើយតបពីបញ្ហានេះបានទេ នៅថ្ងៃទី២ មេសា។
សាលាឆទានខ្មែរក្រោមនៅភូមិកន្រែង ត្រូវបានសាងសង់នៅលើដីឯកជនរបស់ពលរដ្ឋខ្មែរក្រោមមួយគ្រួសារ ដែលផ្ដល់ដីនេះសម្រាប់ផលប្រយោជន៍រួម។ ចាប់តាំងពីពេលសាងសង់ អាជ្ញាធរវៀតណាម បានបញ្ជូនកម្លាំងមករារាំងដំណើរការសាងសង់ និងព្យាយាមដឹកព្រះពុទ្ធរូបចេញពីសាលាឆទាន ជាច្រើនដង ប៉ុន្តែពុទ្ធបរិស័ទខ្មែរក្រោមជម្នះសាងសង់រហូតបានសម្រេចជាស្ថាពរ ដោយហេតុថា ក្នុងតំបន់នោះ គ្មានវត្តខ្មែរក្រោមនៅជិតនោះទេ។
ការឈូសឆាយសាលាឆទាននេះ ធ្វើឡើងបន្ទាប់ពីអាជ្ញាធរវៀតណាម ខេត្តលង់ហោរ កាលពីថ្ងៃទី ២៦ និងថ្ងៃទី២៨ ខែមីនា បានចាប់ផ្សឹកព្រះសង្ឃ គង់នៅវត្តប្រជុំពលមង្គលបូរី ឬហៅថា វត្តទ្រនំសេក ចំនួន៥អង្គ និងចាប់ឃុំខ្លួនពលរដ្ឋខ្មែរក្រោមចំនួន ៤នាក់ក្រោមបទចោទប្រកាន់ «កេងចំណេញ លើសិទ្ធិសេរីភាព និងលទ្ធិប្រជាធិបតេយ្យ» តាមមាត្រា ៣៣១ និងពីបទ «ការចាប់ខ្លួន ឃាត់ខ្លួន ឬឃុំខ្លួនមនុស្ស ដោយខុសច្បាប់» តាម មាត្រា ១៥៧ នៃក្រម ព្រហ្មទណ្ឌ វៀតណាម។
ប្រធាននាយកដ្ឋានព័ត៌មាន នៃសហព័ន្ធខ្មែរកម្ពុជាក្រោម ព្រះតេជព្រះគុណ សឺង យ៉ឹងរតនា ប្រាប់វិទ្យុអាស៊ីសេរី នៅថ្ងៃទី២ ខែឧសភា ថា ការធ្វើទុក្ខបុកម្នេញពលរដ្ឋខ្មែរក្រោមពីសំណាក់អាជ្ញាធរ វៀតណាម តាមរយៈ កម្ទេចសាលាឆទាន និង រារាំងខ្មែរក្រោម មិនឱ្យមានឱកាសរៀនសូត្រ អំពីព្រះពុទ្ធសាសនា ទំនៀមទម្លាប់ និងប្រពៃណីខ្មែរ ជាហូរហែនេះ ដោយសារតែអាជ្ញាធរវៀតណាម មានគោលដៅ ព្យាយាមលុបបំបាត់ពូជសាសន៍ខ្មែរក្រោម ដែលជាជនជាតិដើមម្ចាស់ទឹកដី។
ព្រះតេជព្រះគុណ សឺង យ៉ឹងរតនា៖ «អាជ្ញាធរវៀតណាមកម្ទេចសាលាឆទានហ្នឹង គឺជាការព្យាយាមលុបបំបាត់ពូជសាសន៍ ហើយរើសអើងពូជសាសន៍ចំពោះពលរដ្ឋខ្មែរក្រោម ដែលជាម្ចាស់ស្រុកជនជាតិដើម ជាពិសេសធ្វើយ៉ាងណាកុំឱ្យខ្មែរក្រោមយើងនឹងចេះនូវការគោរពប្រពៃណីទំនៀមទម្លាប់ព្រះពុទ្ធសាសនានៅទីនោះ។ នៅទីនោះ ពួកគាត់នៅឆ្ងាយពីវត្តពិបាកធ្វើដំណើរ»។ ព្រះតេជព្រះគុណ សឺង យ៉ឹងរតនា ប្រធាននាយកដ្ឋានព័ត៌មាន នៃសហព័ន្ធខ្មែរកម្ពុជាក្រោម
ក្នុងរយៈពេលជិត១ឆ្នាំមកនេះ អាជ្ញាធរវៀតណាមបានចាប់ឃុំខ្លួនព្រះសង្ឃ សកម្មជន និងពលរដ្ឋខ្មែរក្រោមដាក់គុកចំនួន១៣ អង្គ/នាក់ ដោយសារសកម្មភាពទាមទារសិទ្ធិសេរីភាពក្នុងនាមជាជនជាតិដើមម្ចាស់ស្រុក។ ទោះជា បែបនេះក្ដី ពលរដ្ឋ ខ្មែរក្រោម នៅភូមិកន្រែង ខេត្តលង់ហោរ ប្ដេជ្ញាចិត្តថា នឹងបន្តធ្វើពិធីរំលឹកខួបសាលាឆទានដែលអាជ្ញាធរវៀតណាមកម្ទេចចោល ក្នុង១ខែ ម្ដង ដើម្បីទាមទារ ឱ្យអាជ្ញាធរវៀតណាមបញ្ឈប់ការធ្វើទុក្ខបុកម្នេញមកលើពួកគាត់បន្តទៅទៀត។
រីឯ អង្គការឃ្លាំមើលសិទ្ធិមនុស្សអន្តរជាតិ (Human Rights Watch) កាលពីថ្ងៃទី២៩ ខែមីនា បានជំរុញឱ្យសហគមន៍អន្តរជាតិ ដាក់ទណ្ឌកម្មលើរដ្ឋាភិបាលវៀតណាម ចំពោះសកម្មភាពរបស់អាជ្ញាធរវៀតណាម ដែលបន្តធ្វើទុក្ខបុកម្នេញលើពលរដ្ឋខ្មែរក្រោម ដែលជាជនជាតិដើមនៅកម្ពុជាក្រោម៕
Leave a Reply