នៅថ្ងៃអង្គារ ទី២៦ វិច្ឆិកា សហព័ន្ធខ្មែរកម្ពុជាក្រោម បានថ្កោលទោសយ៉ាងធ្ងន់ធ្ងរ ចំពោះចំណាត់ការរបស់អាជ្ញាធរវៀតណាម ដែលបានកាត់ទោសព្រះសង្ឃ និងសកម្មជនខ្មែរក្រោមចំនួន ៩អង្គ/នាក់។ ព្រះសង្ឃ និងសកម្មជនខ្មែរក្រោមទាំង៩ អង្គ/នាក់ ត្រូវតុលាការវៀតណាមកាត់ទោសដាក់ពន្ធនាគារពី២ ទៅ ៦ឆ្នាំ ក្រោមបទចោទប្រកាន់ «កេងចំណេញលើសិទ្ធិសេរីភាព និងលទ្ធិប្រជាធិបតេយ្យ» និង «ការចាប់ឃាត់ខ្លួនមនុស្សដោយខុសច្បាប់»។
នៅក្នុងប្រតិកម្មភ្លាមៗ សហព័ន្ធខ្មែរកម្ពុជាក្រោម បានថ្កោលទោសយ៉ាងដាច់អហង្ការចំពោះវិធានការច្បាប់របស់តុលាការវៀតណាម លើព្រះសង្ឃ និងសកម្មជនខ្មែរក្រោមទាំង៩អង្គ/នាក់។ សហព័ន្ធខ្មែរកម្ពុជាក្រោម បានចាត់ទុកថា ការកាត់ក្តីរបស់តុលាការវៀតណាម ធ្វើឡើងដោយលម្អៀង និងគ្មានការធានាចំពោះបុគ្គល ដែលមិនបានធ្វើអ្វី ក្រៅពីការតស៊ូមតិដោយសន្តិវិធីសម្រាប់សិទ្ធិសាសនា និងវប្បធម៌របស់ពលរដ្ឋខ្មែរក្រោម។ ព្រះសង្ឃ និងសកម្មជនខ្មែរក្រោមទាំង៩ អង្គ/នាក់ រួមមាន ព្រះតេជព្រះគុណ ថាច់ ចន្ទតារា ត្រូវបានកាត់ទោសឲ្យជាប់ពន្ធនាគារចំនួន៦ឆ្នាំ ព្រះតេជព្រះគុណ យឿង ខាយ ជាប់គុក ៥ឆ្នាំ ៩ខែ លោក គឹម ឃីម ជាប់គុក ៣ ឆ្នាំ និង លោក ថាច់ វាសនា ជាប់គុក ២ឆ្នាំ ៦ខែ។
ចំណែកព្រះសង្ឃ និងសកម្មជនផ្សេងទៀត ដែលត្រូវបានកាត់ទោសដាក់ពន្ធនាគារចំនួន ២ ឆ្នាំ រួមមានព្រះតេជគុណ ថាច់ វិល័យ ព្រះតេជគុណ ថាច់ ជាប់ ព្រះតេជគុណ គឹម សារឿង យុវជន ថាច់ ញ៉ា និង លោក គឹម ឃូ។ សហព័ន្ធខ្មែរកម្ពុជាក្រោម មើលឃើញថា ចំណាត់ការរបស់រដ្ឋាភិបាលវៀតណាម បានបង្ហាញតឹកតាងកាន់ច្បាស់ពីការគាបសង្កត់លើពលរដ្ឋខ្មែរក្រោម ដែលពួកគេគ្រាន់តែអនុវត្តសិទ្ធិសាសនា និងសិទ្ធិវប្បធម៌ដោយសន្តិវិធីប៉ុណ្ណោះ។ ខណៈនេះ សហព័ន្ធខ្មែរកម្ពុជាក្រោម បានអំពាវនាវដល់សហគមន៍អន្តរជាតិឲ្យមានចំណាត់ការជាបន្ទាន់លើរដ្ឋាភិបាលវៀតណាម។
អ្វីដែលសហព័ន្ធខ្មែរកម្ពុជាក្រោម ចង់បាននៅចំពោះមុខ គឺជំរុញឲ្យអង្គការសហប្រជាជាតិដកប្រទេសវៀតណាមចេញពីសមាជិកក្រុមប្រឹក្សាសិទ្ធិមនុស្ស និងទាមទារឲ្យសហគមន៍អន្តរជាតិចេញសេចក្តីថ្លែងការណ៍សាមគ្គីភាពជួយដល់ព្រះសង្ឃ និងសកម្មជនខ្មែរក្រោម។ ជុំវិញបញ្ហានេះ គេនៅទាន់ឃើញមានប្រតិកម្មបែបណាពីភាគីកម្ពុជានៅឡើយទេ។
គួរកត់សម្គាល់ថា ចំណាត់ការផ្លូវច្បាប់របស់តុលាការវៀតណាម លើព្រះសង្ឃ និងសកម្មជនខ្មែរក្រោមទាំង៩ អង្គ/នាក់ពេលនេះធ្វើឡើង ប៉ុន្មានថ្ងៃក្រោយប្រធានព្រឹទ្ធសភាកម្ពុជា លោក ហ៊ុន សែន បានស្នើសុំដោយផ្ទាល់ទៅកាន់ប្រធានរដ្ឋសភាវៀតណមឲ្យជួយយកចិត្តទុកដាក់ដល់ប្រពៃណី ទំនៀមទម្លាប់ និងការរស់នៅរបស់ពលរដ្ឋខ្មែរក្រោម។ ម្យ៉ាងវិញទៀត ចំណាត់ការផ្លូវច្បាប់របស់តុលាការវៀតណាមនេះធ្វើឡើង ២ថ្ងៃមុនព្រះមហាក្សត្រកម្ពុជា ព្រះបាទនរោត្តម សីហមុនី យាងបំពេញព្រះរាជទស្សនកិច្ចផ្លូវរដ្ឋនៅវៀតណាម ពីថ្ងៃទី២៨ ដល់ថ្ងៃទី២៩ វិច្ឆិកា៕
Leave a Reply