នៅថ្ងៃទី១មេសា ឆ្នាំ២០២៤ ក្រសួងការបរទេសអាមេរិកបានចេញសេចក្តីថ្លែងការណ៍ដោយស្នើឱ្យរដ្ឋាភិបាលវៀតណាមដោះលែងពលរដ្ឋខ្មែរក្រោម ដែលជាប់ឃុំដោយអយុត្តិធម៌ឱ្យមានសេរីភាពឡើងវិញ។ បើតាមក្រសួងការបរទេសអាមេរិក វៀតណាមត្រូវគោរពសិទ្ធិបុគ្គលក្នុងការអនុវត្តសេរីភាពនៃការបញ្ចេញមតិសមាគម និងជំនឿសាសនា។ ការអំពាវនាវរបស់អាមេរិកដូចនេះធ្វើឡើង ខណៈពលរដ្ឋខ្មែរក្រោមចំនួន១២អង្គ/នាក់ត្រូវបានអាជ្ញាធរវៀតណាមចាប់ផ្សឹក និងដាក់ពន្ធនាគារជាបន្តបន្ទាប់។
សហរដ្ឋអាមេរិកបារម្ភយ៉ាងខ្លាំងលើការកាត់ទោស និងការឃុំខ្លួនពលរដ្ឋខ្មែរនៅកម្ពុជាក្រោមចំពោះការតស៊ូមតិដោយសន្តិវិធីរបស់ពួកគេដើម្បីសិទ្ធិមនុស្ស និងសេរីភាពខាងសាសនា ឬជំនឿនៅក្នុងប្រទេសវៀតណាម។ នេះបើតាមសេចក្តីថ្លែងការណ៍របស់ក្រសួងការបរទេសអាមេរិកចុះថ្ងៃទី១ មេសា ឆ្នាំ២០២៤។
ជាក្តីបារម្ភពីព្រោះក្រសួងការបរទេសអាមេរិកមើលឃើញថា ចាប់ពីដើមឆ្នាំ២០២៤ នេះរដ្ឋាភិបាលវៀតណាមបានសម្រេចកាត់ទោសជនជាតិដើមភាគតិច និងអ្នកតស៊ូមតិដើម្បីជំនឿសាសនាដល់ទៅ ៥ករណី។ ៥ករណីនោះរួមមានករណីលោក អ៊ី ក្រែក បយ៉ា ដែលត្រូវវៀតណាមកាត់ទោសឱ្យជាប់ពន្ធធនាគារ១៣ឆ្នាំ និងករណីបន្តដាក់ពន្ធនាគារជាច្រើនឆ្នាំទៅលើលោក ណាយ អ៊ី ប្លាង លោក យ័ង មិញក្វាង លោក ថាច់ កឿង និងលោក តោ ហ្វាង ចឿង។
នៅក្នុងសេចក្តីថ្លែងការណ៍ដដែល ក្រសួងការបរទេសអាមេរិកបានអំពាវនាវឱ្យវៀតណាមគោរពឱ្យបានត្រឹមត្រូវនូវសិទ្ធិបុគ្គល និងការអនុវត្តសេរីភាពនៃការបញ្ចេញមតិ សមាគម និងជំនឿសាសនា។ ទន្ទឹមគ្នានេះ ក្រសួងការបរទេសអាមេរិកក៏បានស្នើឱ្យវៀតណាមដោះលែងអ្នកដែលជាប់ឃុំដោយអយុត្តិធម៌ទាំងអស់ផងដែរ។
គួរជម្រាបជូន មានពលរដ្ឋខ្មែរក្រោមសរុប១២អង្គ/នាក់ ត្រូវបានអាជ្ញាធរវៀតណាមសម្រេចកាត់ទោស និងចាប់ឃុំជាបន្តបន្ទាប់។ ក្នុងនោះមានព្រះចៅអធិការវត្តទ្រនុំសេក និងព្រះសង្ឃ៤អង្គត្រូវបានអាជ្ញាធរវៀតណាមចាប់ផ្សឹក និងឃុំខ្លួនកាលពីសប្តាហ៍មុនពីបទបានរំលោភបំពានច្បាប់រដ្ឋវៀតណាម។ ជុំវិញបញ្ហានេះ សហព័ន្ធខ្មែរកម្ពុជាក្រោមបានប្រកាសគ្រោងធ្វើបាតុកម្មនៅមុខអង្គការសហប្រជាជាតិក្នុងទីក្រុងហ្សឺណែវ ប្រទេសស្វ៊ីស នៅថ្ងៃទី៧ ឧសភាខាងមុខដើម្បីទាមទារឱ្យវៀតណាមដោះលែងព្រះសង្ឃនិងពលរដ្ឋខ្មែរក្រោមឱ្យមានសេរីភាពឡើងវិញ។
ដោយឡែក សារព័ត៌មានសំឡេងកម្ពុជាក្រោមបានឱ្យដឹងថា ក្រៅពីការចាប់ឃុំខ្លួនព្រះសង្ឃ និងពលរដ្ឋខ្មែរក្រោម អាជ្ញាធរវៀតណាមនៅថ្ងៃទី១មេសា ឆ្នាំ២០២៤ បានឈូសកម្ទេចសាលាឆទាននៅខេត្តលង់ហោរដែលផ្ដួចផ្ដើមសាងសង់ដោយព្រះចៅអធិការវត្តទ្រនុំសេក និងសកម្មជនខ្មែរក្រោមជាប់ឃុំផ្សេងទៀត៕
Leave a Reply